ယောဆရာတော်ကြီး၏ ဩဝါဒပဒေသာ (၄)
၂၀။ အကောင်းမှန်ရင် နည်းတာချည်းပဲ
****************************************
လောကမှာ အကောင်းမှန်ရင်
နည်းတာ ချည်းပဲ၊
မကောင်းတာဆို၊ များတာချည်းပဲ၊
အဆိုးများပေမယ့်၊
အဆိုးသည် အားမကိုးရပါ၊
အကောင်းသည် နည်းသော်လည်း
စွမ်းအားပါလို့ အားကိုးရပါတယ်။
ကိုယ့်ဟာကိုယ်အရှုံးပေးသောပွဲ
****************************************
ကိုယ့်ဟာကိုယ် အရှုံးပေးရတာ
အနစ်နာဆုံး၊
ကိုယ့်ဟာကိုယ် အရှုံးပေးရတာ
ကျက်သရေ အယုတ်ဆုံး၊
ကိုယ့်ဟာကိုယ် အရှုံးပေးရတာ
အောက်တန်း အကျဆုံး၊
ကိုယ့်ဟာကိုယ် အရှုံးပေးရတာ
အပါယ်ကျတယ်။
သူများအရှုံးပေးရတာ
အပါယ်မကျဘူး။
၂၁။ ကိုယ့်ဟာကိုယ်အနိုင်ယူရသောပွဲ
****************************************
လောကအောင်ပွဲမှန်သမျှတွင်
ကိုယ့်ဟာကိုယ်အနိုင်ယူတဲ့ အောင်ပွဲသာ
အမြင့်မြတ်ဆုံးပါ။
သူများကို အနိုင်ယူရတဲ့ အောင်ပွဲက
သုဂတိဘဝရောက်ဖို့လည်း မသေချာပါဘူး၊
အပါယ်ကလွတ်ဖို့လည်း မသေချာပါဘူး၊
အပူတွေ ငြိမ်းဖို့လဲ မလွယ်ပါဘူး၊
မဂ်ဖိုလ်နိဗ္ဗာန်ရောက်ဖို့လည်းမလွယ်ပါဘူး။
ကိုယ့်ဟာကိုယ်အနိုင်ယူရတဲ့
အောင်ပွဲကသာ သုဂတိနိဗ္ဗာန်ရောက်ဖို့၊
သေချာပေါက်လမ်းမကြီး၊
သေချာပေါက်စွမ်းအားကြီး။
ကိုယ့်ဟာကိုယ် အနိုင်ယူနိုင်မှ
အပူငြိမ်းကြမယ်၊ ဒုက္ခလွတ်ကြမယ်၊
မဂ်ဉာဏ်၊ ဖိုလ်ဉာဏ်၊
နိဗ္ဗာန်ရောက်ကြမယ်။
၂၂။ အဝိဇ္ဇာနှင့်တဏှာ
****************************************
အဝိဇ္ဇာဆိုတာ ဆင်းရဲဒုက္ခ
အပူတည်ဆောက်ရေးအဖွဲ့ကြီးရဲ့ ဥက္ကဋ္ဌ၊
တဏှာဆိုတဲ့ လောဘက ဆင်းရဲဒုက္ခ
အပူတည်ဆောက်ရေးအဖွဲ့ကြီးရဲ့
အကျိုးဆောင်အတွင်းရေးမှူးချုပ်ကြီး
ဘဝသံသရာကြီးတစ်ခုလုံးကို
အဝိဇ္ဇာနဲ့ တဏှာနှစ်ပါးက
ထိန်းချုပ်ထားတာ၊
အဝိဇ္ဇာနဲ့ တဏှာဟာ သံသရာမှာ
ချုပ်ကိုင်ထားတဲ့ ကြိုးနှစ်ချောင်း။
သူတို့နှစ်ပါးအဖြစ်များလာရင်
ကုသိုလ်တွေ တစ်စတစ်စ
အားနည်းပျောက်ကွယ်သွားတယ်။
တစ်ခါတစ်ရံစတောင် မစဖြစ်ဘူး၊
အစလေးကို ပေါ်မလာဘူး၊
တစ်ခါတစ်ရံလုပ်မယ်လို့
အားခဲပြီးတော့
အစလေးဖေါ်ပေးလိုက်တယ်၊
မကြာခင် အစဖျောက်ပစ်လိုက်တယ်။
တစ်ခါတရံ စလိုက်တယ်၊
နည်းနည်းလေး လုပ်မိတယ်၊
လမ်းဆုံးမရောက်ဘူး၊
လမ်းတစ်ဝက်တင် ပြတ်သွားတယ်။
တစ်ခါတစ်ရံ ပြီးခါနီးလေးမှ
ပြတ်သွားတယ်၊
အဝိဇ္ဇာနဲ့တဏှာက
ကြိုးချုပ်ကိုင်ထားတာ၊
သံသရာလည်နေကြတာဟာ၊
အမှန်တော့ အဝိဇ္ဇာနဲ့တဏှာကြောင့်။
၂၃။ မိုက်တော့ကြိုက်တယ်
****************************************
အဝိဇ္ဇာက အရမ်းမိုက်တော့
တဏှာက အရမ်းကြိုက်၊
ခန္ဓာတွေ အရမ်းလိုချင်၊
စည်းမရှိကမ်းမရှိ လက်ခံ။
နောက်တော့ မောဟိုက်ပင်ပန်းပြီး၊
နိမ့်လိုက်မြင့်လိုက်၊ ဆင်းလိုက်တက်လိုက်။
ကိုယ့်ဟာကိုယ်ထိမ်းနိုင်စွမ်း၊
သိမ်းနိုင်စွမ်းလုံးဝမရှိ။
သံသရာခရီးကြီးမှာ
မျောချင်သလိုမျောပြီးတော့သွားရမယ်။
ပစ္စုပ္ပန်အရေးအကြီးဆုံး
****************************************
သာသနာကတော့
ပစ္စုပ္ပန် အရေးကြီးဆုံးပါ။
မနက်ဖြန်ထက် ဒီနေ့က
ပိုအရေးကြီးပါတယ်။
နောက်နှစ်ထက် ဒီနှစ်က
ပိုအရေးကြီးပါတယ်။
နောက်ဘဝထက် ယခုဘဝက
ပိုအရေးကြီးပါတယ်။
ပစ္စုပ္ပန်အရေးကြီးဆုံးဖြစ်သောကြောင့်၊
ပစ္စုပ္ပန်အခွင့်အရေးကို
လက်လွတ်မခံပဲ ကြိုးစားပါ။
အရှင်သိရိန္ဒာဘိဝံသ
{တိပိဋကဓရ ယောဆရာတော်ဘုရားကြီး}
တိပိဋကဓရ-ဓမ္မဘဏ္ဍဂါရိက
(ယောဆရာတော်)
ဩဝါဒပဒေသာများ
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
