ယောဆရာတော်ကြီး၏ ဩဝါဒပဒေသာ (၉)
၅၃။ ပေးရမယ့်အတူတူ
****************************************
ပေးရမယ့်အတူတူ၊
ကုသိုလ်ဖြစ်အောင်သာပေး၊
သုံးရမယ့်အတူတူ၊
ကုသိုလ်ဖြစ်အောင်သာသုံး၊
လက်ထဲကလွှတ်လိုက်သမျှဟာ
ဒါနချည်းပဲ၊ မေတ္တာချည်းပဲ။
ခန္ဓာပေါ့စေလိုသော် အသိတရားနဲ့ထမ်း
****************************************
ဉာဏ်ရှိသူများ ခန္ဓာထမ်းရတာတယ်ပေါ့၊
ခန္ဓာဟာအသိတရားနဲ့ထမ်းမှပေါ့တယ်၊
အဖိုးတန်တယ်။
ပစ္စည်းဆိုတာလဲ အသိတရားနဲ့ရှာမှ၊
အဖိုးတန်တယ်၊ ပေါ့တယ်။
အသိတရားရှိသူရဲ့ လက်ထဲကို
ရောက်သွားတဲ့ ပစ္စည်းများ၊
တစ်ဆယ့်ကိုးကျပ်လဲ အဖိုးတန်တာပဲ၊
တစ်ရာကိုးဆယ်လဲ အဖိုးတန်တာပဲ။
ယခုလို သာသနာအတွက်
ချီးမြှောက်ပြန်တော့လဲ
အတိုင်းထက်အလွန် တန်ဖိုးတွေ
ဆုံးဖြတ်လို့ မရအောင်
အလွန်အလွန်မှ အဖိုးတန်တယ်။
၅၄။ ဆွမ်းလှူရခြင်းအကျိုး(၅)မျိုး
****************************************
၁။ ဆွမ်းလှူရခြင်းသည်
အသက်ကို လှူရာရောက်၏၊
လှူသောပုဂ္ဂိုလ်မှာ အဆင်းလှသည်။
၂။ ဆွမ်းလှူရခြင်းသည်
အဆင်းကျက်သရေကို လှူရာရောက်၏၊
လှူသောပုဂ္ဂိုလ်မှာ အဆင်းလှသည်။
၃။ ဆွမ်းခဲဘွယ်ဘောဇဉ်ကို
လှူသောသူသည်
ချမ်းသာကို လှူရာရောက်၏၊
လှူသောပုဂ္ဂိုလ်မှာ
ကိုယ်စိတ်နှစ်ပါးချမ်းသာသည်။
၄။ စားဘွယ်ဘောဇဉ်ကို လှူသောသူသည်
ခွန်အားကို လှူရာရောက်၏၊
ကျန်းမာရေးကို လှူရာရောက်၏၊
လှူသောပုဂ္ဂိုလ်မှာ ခွန်အားကောင်းသည်။
ကျန်းမာရေးကောင်းသည်။
၅။ ဆွမ်းခဲဘွယ်၊ ဘောဇဉ်ကို
လှူသောသူသည်
ဉာဏ်ကိုလှူရာရောက်၏၊
လှူဒါန်းသူမှာ ဉာဏ်ကောင်းသည်။
၅၅။ ပထမတန်းစားဒါန
****************************************
အလှူဒါနလုပ်သောအခါ -
(၁) နိဗ္ဗာန်ကို ရည်မှန်းချက်ထားပြီးလှူပါ။
(၃) ဝမ်းမြောက်ဝမ်းသာ ပျော်ပျော်ကြီးလှူပါ။
(၄) တက်တက်ကြွကြွ၊ ထက်ထက်သန်သန်၊
အောင်ပွဲတစ်ခုရလိုက်သလို လှူပါ။
(၅) သီလ၊ သမာဓိ၊ ပညာ၊
သိက္ခာ သုံးပါးလမ်းကြောင်း
ရှင်းပြီးမှ လှူပါ။
(၆) အပူကင်းသည့်စိတ်ဖြင့်
ရှေ့နှင့်နောက်သတိနှင့်
အသိချင်းစပ်ပြီးမှလှူပါ။
ထိုအလှူမျိုးသည် ပထမတန်းစားဒါနဖြစ်၏
မိမိအတွက်လည်း အားကိုးစရာ၊
သာသနာအတွက် အားကိုးစရာ
ဖြစ်သွားရပေသည်။
၅၆။ ပရိတ်ဟူသည်
****************************************
ပရိတ်ဆိုတာ၊ မြန်မာလိုတော့၊
အကာအကွယ်၊ အရံအတား
အစောင့်အရှောက်လို့ အဓိပ္ပါယ်ရတယ်။
ရောက်ရှိလာနိုင်တဲ့ ဘေးရန်အန္တရာယ်
အနှောင့်အယှက်မျိုးစုံ ကင်းစင်သွားအောင်
ပယ်ရှားသုတ်သင်ပေးနိုင်သော
အင်အားရှိတယ်။
ဝင်ရောက်လာမယ့်
ဘေးရန် အနှောက်အယှက်မျိုးစုံကိုလဲ
ဝင်ရောက်မလာအောင် ကာကွယ်ပိတ်ဆို့
တားဆီးပေးနိုင်တယ်။
ပရိတ်ဆိုတာ သူလိုကိုယ်လို ပုဂ္ဂိုလ်တွေ
ဖန်တီးထားတဲ့ ဂါထာမန္တာန်
အကြံအဖန်တရားတွေ မဟုတ်ပါ။
တရားလုံးစုံအကုန်သိမြင်တော်မူတဲ့
မြတ်စွာဘုရားကိုယ်တော်တိုင်
နှုတ်တော်ဖြင့် ဟောမြွက်ထားတဲ့
အလုံးတိုင်း၊ အပုဒ်တိုင်း၊ အက္ခရာတိုင်းမှာ၊
မေတ္တာဓါတ်တွေ ကရုဏာစိတ်တွေ၊
စွမ်းအားဓါတ်တွေ၊ အရှိန်အဝါဓါတ်တွေ၊
သာသနာမကွယ်သမျှ တည်နေတဲ့
မြတ်စွာဘုရားရဲ့ နှုတ်တော်ထွက်
စကားလုံးများ ဖြစ်တယ်။
ပရိတ်ဆိုတာ ဘုန်းကြီးတွေ ရွတ်ရင်
ပြီးတာပဲလို့ သဘောထားရင်
ပရိတ်စွမ်းအားဟာ
တစ်ဝက်မက လျော့သွားတယ်။
ဟောသူရွတ်သူက စစ်မှန်စင်ကြယ်တဲ့
မေတ္တာစေတနာနဲ့ ရွတ်တာဖြစ်လို့
နာသူတွေကလည်း တကယ်ကို
စင်ကြယ်တဲ့ ယုံကြည်မှုသဒ္ဓါတရား၊
ပညာတရား၊ သမာဓိနဲ့စူးစိုက်ပြီး
နာကြားကြရမှာ ဖြစ်ပါတယ်။
အရှင်သိရိန္ဒာဘိဝံသ
{တိပိဋကဓရ ယောဆရာတော်ဘုရားကြီး}
တိပိဋကဓရ-ဓမ္မဘဏ္ဍဂါရိက
(ယောဆရာတော်)
ဩဝါဒပဒေသာများ
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
