ယောဆရာတော်ကြီး၏ ဩဝါဒပဒေသာ (၂)
၇။ မေတ္တာစွမ်းအား
****************************************
မေတ္တာဆိုတဲ့တရားစွမ်းအား၊
နှလုံးသားမှာကိန်းနေတဲ့ ပုဂ္ဂိုလ်သည်
လောကအလှ တန်ဆာဆင်နိုင်တယ်၊
လူ့ဘဝတန်ဖိုး မြင့်မားသွားစေနိုင်တယ်၊
လက်ထဲမှာ ရှိတဲ့ပစ္စည်းတွေ
တန်ဖိုးကြီးမားသွားစေနိုင်တယ်၊
ဖြုန်းတီးမှုဘက်ကိုမရောက်တော့ပါဘူး။
မေတ္တာစွမ်းအားသည်
ဘဝကိုလည်းလှစေတယ်၊
ပစ္စည်းတွေကိုလည်း လှစေတယ်၊
ကိုယ့်ကိုကိုယ်သာ အလှဆင်နိုင်တာ မဟုတ်၊
အများကိုလည်း အလှဆင်ပေးနိုင်တယ်။
၈။ ကမ္ဘာကိုအလှဆင်မည့် ဗုဒ္ဓဘာသာ
****************************************
ဗုဒ္ဓဘာသာသည်
ကမ္ဘာကို အလှဆင်ဖို့ ပေါ်လာရခြင်းပါ၊
ဗုဒ္ဓသာသနာသည်
လောကကို အလှဆင်ဖို့ ပေါ်လာခြင်းပါ။
ဤကမ္ဘာကြီးကို ရုပ်ဝတ္ထုတစ်မျိုးထဲ
အလှဆင်ရုံလေးနဲ့ အလှမစုံလင်ဘူး၊
တရားအလှပါတွဲပြီး အလှဆင်ပေးမှ
ကမ္ဘာကြီးလှတယ်။
လောကကို ရုပ်ပစ္စည်းတစ်မျိုးထဲ
အလှဆင်ရုံနဲ့၊ အလှသည် မလုံလောက်ပါ၊
တရားမပါဘဲ ရုပ်ဝတ္ထုတစ်မျိုးထဲ
အလှဆင်နေရင် အချိန်မရွေး
မီးထတောက် ပေါက်ကွဲပြာကျ
ဒုက္ခဖြစ်သွားနိုင်ပါတယ်။
တရားစွမ်းအားနဲ့တွဲပြီး အလှဆင်ပေးမှ
တည်ငြိမ်မယ်၊ ရင့်ကျက်မယ်၊
အေးချမ်းမယ်၊ စွမ်းအားပြည့်မယ်၊
မြင့်မားပြီးတော့ ထူးခြားတဲ့ စွမ်းအားရမယ်။
၉။ ကမ္ဘာ့အချမ်းသာဆုံးလူ
****************************************
ကမ္ဘာ့အချမ်းသာဆုံးလူဆိုတာ
စိတ်သန့်စင်အောင် တရားစွမ်းအားနဲ့
နေထိုင်သူများကို ခေါ်ပါတယ်။
ကမ္ဘာ့အချမ်းသာဆုံးလူ
ဖြစ်ချင်တယ်ဆိုရင်
စိတ်သန့်စင်တဲ့ စက်ထဲမှာ
စိတ်ကိုနေ့စဉ် ပုံမှန်ထည့်ပေးရမယ်။
ကမ္ဘာ့အချမ်းသာဆုံးလူစာရင်းထဲ
ပါချင်တယ်ဆိုရင် ...
စိတ်အပူကိုအအေးခံတဲ့
ဗုဒ္ဓသာသနာဆိုတဲ့ စက်ကြီးထဲမှာ
စိတ်ကို နေ့စဉ်ပုံမှန်ထည့်ပေးရမယ်၊
ဒါမှချမ်းသာတဲ့လူလို့ ပြောလို့ဖြစ်မှာ။
၁၀။ ချမ်းသာဖို့အာမခံတယ်
****************************************
မနက်ဖြန်ချမ်းသာဖို့ထက်၊
ယခုချမ်းသာဖို့က အရေးကြီးတယ်၊
နောက်ဘဝချမ်းသာဖို့ထက်၊
ယခုဘဝချမ်းသာဖို့အရေးကြီးတယ်၊
တရားကအကုန်အာမခံတာဝန်ယူတယ်၊
ပစ္စုပ္ပန်တိုင်း ပျော်စေရမယ်၊
ပစ္စုပ္ပန်တိုင်း ချမ်းသာစေရမယ်၊
ပစ္စုပ္ပန်တိုင်း ကြည်နူးစေရမယ်။
ဘယ်ဘာသာ၊ ဘယ်လူမျိုး၊
ဘယ်ပုဂ္ဂိုလ်လို့ ကန့်သတ်ထားခြင်း မရှိပါ၊
တရားနဲ့စိတ်ထိတွေ့သွားတာနဲ့၊
ဘယ်သူမဆို ချမ်းကိုချမ်းသာရမယ်။
၁၁။ လူရဲ့ထောက်တည်ရာ
****************************************
လူ့ဘဝ နောက်ဆုံး အနှစ်ချုပ်ထုတ်ပါ၊
တရားကလွဲရင် ဘာမှမရှိပါဘူး၊
မိမိယခုရထားတဲ့ ခန္ဓာကိုယ်ကြီးတောင်မှ
အချိန်စေ့ရင် ပျက်ပြုန်းပြီးတော့
သွားရဦးမယ်။
ကိုယ်လက်ထဲ ရှာဖွေစုဆောင်းထားတဲ့
ပစ္စည်းဥစ္စာ အကုန်လုံး၊
အချိန်စေ့ရင် ကုန်ဆုံးပြီး
သွားကြပေလေဦးမယ်။
မိမိနှင့်ဘဝတစ်ကွေ့လေးမှာ
တွေ့ဆုံနေတဲ့ ဆွေတွေ မျိုးတွေ၊
အချိန်စေ့တော့၊ သူတစ်လမ်း
ကိုယ်တစ်လမ်းသွားကြမယ်။
ဒီတော့ဘာအားကိုးမလဲ...?
တရားပဲကျန်မှာပေါ့၊
လူရဲ့အနှစ်ချုပ်ဟာတရားပဲ၊
လူ့စွမ်းအားဟာ တရားပဲ၊
လူရဲ့ထောက်တည်ရာ တရားပဲ။
၁၂။ တရားအရသာ
****************************************
လောကရဲ့ အရသာတွေထဲမှာ
တရားအရသာသည် အကောင်းဆုံး၊
လောကမှာ တရားသည်
အကြီးမားဆုံးသော အင်အား၊
တရားသည် နောက်ပိတ်ဆုံး
လူ့ဘဝမှာ အသက်ကယ်ဆေး၊
ဘယ်သူတွေ
လက်မြှောက်တယ်ပြောပြော၊
တရားကလက်မမြောက်ပါဘူး၊
တရားကို တရားလိုပဲ စိတ်ဝင်စားပါ၊
တရားကလည်း တရားလိုပဲ၊
ကိုယ့်အပေါ်မှာ အမြဲသစ္စာရှိပါတယ်၊
ဒါကြောင့် တရားဟာ အဖိုးတန်ဆုံး၊
အင်အားအကြီးမားဆုံး၊
အဲဒီတရားလိုချင်ရင်
စားဝတ်နေရေး၊ လူမှုရေး၊
စီးပွားရေးအလုပ်တွေလုပ်ရင်းနဲ့
တရားရနိုင်ပါတယ်။
၁၃။ တရားမပါရင်
****************************************
စိတ်ဆိုတာ တရားမပါရင်၊
ဘယ်အာရုံနဲ့မှမတည့်ပါဘူး၊
အာရုံတိုင်းနဲ့ အကုန်ရန်ဖြစ်နေတာပဲ။
အာရုံနဲ့စိတ် အဆင်ပြေအောင် နေနိုင်တာ၊
မေတ္တာစသော
တရားစွမ်းအားကြောင့် နေနိုင်တာ။
တရားမပါရင်
ဘဝကူးအခက်အခဲက ကြီးမားပါတယ်၊
အဲဒီကြီးမားတဲ့ အခက်အခဲကို
ဖြေရှင်းပေးနိုင်တာ ကောင်းမှုစွမ်းအားပေါ့။
တရားမပါရင်၊ လူ့ဘဝဟာ
လုံးဝမချမ်းသာပါဘူး၊
ဘယ်လောက်ပဲရှိရှိ၊
ရှိသမျှတွေဟာ အငှားတွေချည်းပဲ၊
ပစ္စည်းဘယ်လောက်ပဲ ကြွယ်ဝကြွယ်ဝ
ရာထူးဘယ်လောက်ပဲရှိရှိ၊
ဘာတွေပဲပြည့်စုံပြည့်စုံ၊
ဉာဏ်နဲ့ကြည့်လိုက်တော့
အငှားတွေချည်းပဲ။
နောက်ပိတ်ဆုံး
ကိုယ့်ခန္ဓာတောင် ခဏငှားထားတဲ့
အငှားဖြစ်နေတာ တွေ့ရမှာပါ။
ကုသိုလ်တရားသာ မပါဘူးဆိုရင်
လူ့ဘဝ လုံးဝချမ်းသာမှာ မဟုတ်ဘူး၊
ချမ်းသာဖို့၊ ငြိမ်းအေးဖို့၊
တွေ့သမျှနဲ့ အဆင်ပြေဖို့၊ နေတတ်ဖို့၊
ပစ္စုပ္ပန်ဘဝသာမက သံသရာဘဝကူးအထိ
စိတ်အေးရဖို့ဆိုရင်၊
ကုသိုလ်တရားဧကန်ကို လုပ်ရမှာ။
အရှင်သိရိန္ဒာဘိဝံသ
{တိပိဋကဓရ ယောဆရာတော်ဘုရားကြီး}
တိပိဋကဓရ-ဓမ္မဘဏ္ဍဂါရိက
(ယောဆရာတော်)
ဩဝါဒပဒေသာများ
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
