တရားပလ္လင်ထက်က စကားအလင်္ကာများ (၄-၅-၆)
၄။ ဥပုသ်စောင့်ခြင်း အဓိပ္ပါယ်
***************************************
“ဥပုသ်စောင့်တယ်”ဆိုတာ
ကိုယ်ကျင့်တရားတွေနဲ့နေတာ၊
ကိုယ်ကျင့်တရားတွေ
ကိုယ်ကျင့်သီလတွေကို
“ဥပုသ်” လို့ ခေါ်တယ်၊
စောင့်တယ်ဆိုတာ
အဲဒီကိုယ်ကျင့်သီလတွေကို
ထိန်းသိမ်းတာ၊ မကျိုးမပေါက်
မပျောက်မကြားရအောင်
ထိန်းသိမ်းစောင့်ရှောက်တာ၊
ဒီလိုအဓိပ္ပါယ်ရတယ်။
နာမည်အားဖြင့်
ဥပုသ်စောင့်တယ်လို့ဆိုပေမယ့်
အနှစ်သာရပိုင်း ကွာခြားသွားလို့ရှိရင်
အကျိုးပေးခြင်းကလည်း
ကွာခြားသွားနိုင်တယ်၊
ဒါကြောင့်မို့ မှန်ကန်တဲ့နည်းလမ်းနဲ့
အဓိပ္ပါယ်ရှိရှိ ဥပုသ်စောင့်တတ်ဖို့
ပိုအရေးကြီးပါတယ်။
ဥပုသ်စောင့်တယ်ဆိုပြီးတော့
မှန်ကန်တဲ့ရည်ရွယ်ချက်တွေ မရှိဘူးဆိုရင်
ထိုဥပုသ်စောင့်ခြင်းရဲ့အကျိုးဟာ
များစွာရမှာ မဟုတ်ပါဘူး။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅။ ယနေ့လူသားများရဲ့ မနက်ဖြန်ကမ္ဘာ
****************************************
ဒုစရိုက်တွေလုပ်တာနဲ့
လူ့ရဲ့သက်တမ်းဟာ
ဘာကြောင့် လျော့ကျရသလဲ..?
ကြောင်းကျိုးဆီလျော်မှု ရှိရဲ့လားလို့
စဉ်းစားကောင်း စဉ်းစားမိကြပါလိမ့်မယ်။
လူနဲ့ ပြင်ပကမ္ဘာဆိုတာ
အမြဲတမ်း ဆက်စပ်ပြီးတော့နေတာပါ၊
လူတွေရဲ့ စိတ်ပိုင်းဆိုင်ရာ
ကျဆင်းသွားတာနဲ့တစ်ပြိုင်နက်
ရာသီဥတုကို သွားထိခိုက်ပါတယ်၊
လူတွေရဲ့ စိတ်အပေါ်မှာ မူတည်ပြီးတော့
ရာသီဥတုတွေ ဖေါက်ပြန်လာတယ်၊
ထိုအခါ ရာသီဥတုပေါ်မှာမှီပြီး
စိုက်ပျိုးရတဲ့ သီးနှံတွေ သီးပင်
စားပင်တွေမှာ အဆီဩဇာတွေ
ယုတ်လျော့သွားတယ်၊
ထိုအဆီဩဇာယုတ်လျော့သွားတဲ့
အာဟာရတွေကို စားသုံးရတဲ့
လူတွေရဲ့ သက်တမ်းဟာ
ကျဆင်းပြီးတော့ သွားတာပါ။
ကုသိုလ်တရားတွေကို
ဆောက်တည်ခြင်းဖြင့်
လူတွေရဲ့ သက်တမ်းဟာ
တိုးတက်နိုင်သလို၊
အကုသိုလ်တရားတွေကို
ဆက်လက်လုပ်ကိုင်နေခြင်းဖြင့်
လူတွေရဲ့ သက်တမ်းဟာ
ကျဆင်းသွားနိုင်ပါတယ်၊
ဒါကြောင့် မြတ်ဗုဒ္ဓက
“မိမိသည်သာလျှင်
မိမိ၏ကိုးကွယ်ရာ ဖြစ်ကြပါစေ၊
မိမိကျင့်သုံးတဲ့တရားသည်သာ
မိမိရဲ့ကိုးကွယ်ရာ ဖြစ်ကြပါစေ” လို့
ဟောတော်မူထားပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၆။ မင်္ဂလသုတ် အနှစ်ချုပ်
****************************************
ဒီကနေ့ကမ္ဘာမှာ ရှိကြတဲ့လူတွေ
လူမျိုးအသီးသီးမှာ
အယူအဆအမျိုးမျိုး
ပေါင်းသင်းဆက်ဆံမှုတွေ
အမျိုးမျိုး ရှိကြပါတယ်၊
အဲဒီကြားထဲ သွားပြီး လူဖြစ်လို့ရှိရင်
ဆိုင်ရာ အသိုင်းအဝိုင်းအလိုက်
အတွေးအခေါ်တွေအမျိုးမျိုး
ပုံစံအမျိုးမျိုးနဲ့ နေကြရတယ်၊
ကိုယ့်ရဲ့လုပ်ဆောင်ချက်တွေကြောင့်
ကောင်းကျိုးချမ်းသာတွေ
ရကြတာရှိသလို
မကောင်းတဲ့အကျိုးတွေ
ခံစားကြရတာလည်း ရှိတာပေါ့။
တရားကို ကျင့်သုံးတဲ့သူဟာ
ဘဝခရီးကို လျှောက်လှမ်းရာမှာ
အောက်တန်းနောက်တန်း
ကျသွားမှာ မဟုတ်ပါဘူး၊
မင်္ဂလသုတ်မှာ ဘဝခရီးကို
လျှောက်လှမ်းသွားတဲ့ပုဂ္ဂိုလ်တိုင်း
တစ်ဆင့်ပြီး တစ်ဆင့် တက်ပြီး
ကျင့်သွားပုံကို မြတ်စွာဘုရားက
ဟောထားတာ ဖြစ်တယ်။
ဒါကြောင့် သူတော်စင်အပေါင်းအားလုံး
မင်္ဂလာတရား လက်ကိုင်ထားပြီး
မိမိတို့ဘဝခရီးကို မင်္ဂလာလမ်းမပေါ်မှ
လျှောက်လှမ်းနိုင်ကြပါစေ။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
