တရားပလ္လင်ထက်က စကားအလင်္ကာများ (၁၂-၁၃-၁၄)
၁၂။ သာရဏီယတရား
****************************************
“သာရဏီယတရား” ဆိုတာ
ညီညွတ်ရေးကို များစွာအကျိုးပြုတဲ့
တရားဖြစ်တယ်၊ အစဉ်ထာဝရ
မှတ်ထားကြရမည့်တရား
အစဉ်အောက်မေ့ကြရမည့်
တရား ဖြစ်တယ်။
ပိယကရဏ = တစ်ဦးနဲ့တစ်ဦး
ချစ်ခင်မှုကို ဖြစ်စေတယ်။
ဂရုကရဏ = တစ်ဦးနဲ့တစ်ဦး
လေးစားမှုကို ဖြစ်စေတယ်။
သင်္ဂဟာယ = စုစည်းထားဖို့အတွက်၊
အဝိဝါဒါယ = အငြင်းအခုံ ကင်းဖို့အတွက်၊
သာမဂ္ဂီယာ = ကိုယ်စိတ် ညီညွတ်ဖို့အတွက်၊
ဧကီဘာဝါယ - တစ်ခုတည်း ဖြစ်ဖို့အတွက်၊
ဟောဒီတရား ခြောက်မျိုးဟာ
အကျိုးပြုပါလိမ့်မယ်လို့
မြတ်စွာဘုရားက ဟောထားတာ။
ကုသိုလ်ကောင်းမှုလုပ်ပြီး
ဘာသာရေးအသင်းအဖွဲ့တွေ
လုပ်တဲ့အခါမှာ
ဒီသာရဏီယတရားကို
မလိုက်နာဘဲ လုပ်မယ်ဆိုရင်
အကုသိုလ်တွေ တိုးပွါးလာနိုင်တယ်၊
ဘာကြောင့်လဲ..?
အငြင်းအခုံဖြစ်မှုကို
အကြောင်းပြုသွားလို့ ဖြစ်ရတာ။
တစ်ဦးနဲ့တစ်ဦး မတည့်တာကို
အကြောင်းပြုပြီးတော့
အကုသိုလ်တွေ ဖြစ်လာတယ်၊
ကုသိုလ်ရရမယ့်အစား
အကုသိုလ်တွေပဲ
တိုးပွါးလာနိုင်တယ်ပေါ့၊
ဒါကြောင့် ဒီသာရဏီယတရားဟာ
အစဉ်ထာဝရ လေးစားပြီး
လိုက်နာကျင့်ကြံရမည့်
တရားတွေ ဖြစ်တယ်ဆိုတာ
မှတ်သားထားဖို့ လိုအပ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၁၃။ အလေးထား၍ စဉ်းစားဆင်ခြင် ကောင်းအောင်ပြင်
********************************************
၁။ ကိုယ့်ကိုယ်ကို အလေးထားပြီး
ဆင်ခြင်ရမယ်။
၂။ ကိုယ့်ပတ်ဝန်းကျင် လောကကြီးကို
အလေးထားပြီး ဆင်ခြင်ရမယ်။
၃။ တရားဓမ္မကို အလေးထားပြီး
ဆင်ခြင်ရမယ်။
ဘယ်လိုစဉ်းစားဆင်ခြင်ရမလဲ..?
၁။ အသိဉာဏ်ရှိတဲ့ လူ့ဘဝရလာခိုက်
ကိုယ်ကျင့်သီလကောင်းအောင်
ငါကြိုးစားမယ်၊ ဥပုသ်နေ့တိုင်း
ရှစ်ပါးသီလ ဆောက်တည်မယ်၊
နေ့စဉ်နဲ့အမျှ
ဒါနကောင်းမှု ပြုနိုင်အောင်
သတိထားကြိုးစားမယ်ဆိုပြီး
ကိုယ့်ကိုယ်ကို အလေးထားကာ
ကိုယ့်သန္တာန်မှာ
အကုသိုလ်တရားတွေ ဖယ်ရှားဖို့
ကုသိုလ်တရားတွေ တိုးပွါးလာဖို့
ဆင်ခြင်စဉ်းစား အားထုတ်ရမယ်။
၂။ “လောကကြီးမှာ
ငါတစ်ယောက်တည်း မဟုတ်ဘူး၊
လောကကြီးမှာ တန်ခိုးရှင်တွေ ရှိတယ်၊
ဖုံးကွယ်ထားတဲ့အရာတွေကို
သူတို့က မြင်နိုင်စွမ်း ရှိတယ်၊
သူတို့မြင်သွားရင်
ငါလုပ်တဲ့အလုပ်တွေဟာ
အရှက်ကွဲစရာ ဖြစ်လိမ့်မယ်”ဆိုပြီး
ကိုယ့်ရဲ့ပတ်ဝန်းကျင်လောကကို
အလေးထားပြီး ဆင်ခြင်သုံးသပ်ကာ
အကုသိုလ်ကို ရှောင်ရမယ်၊
ကုသိုလ်ကိုသာ လုပ်ရမယ်။
၃။ ကိုယ်ကျင့်တရားတွေအပေါ်မှာ
အလေးထားတယ်၊
“တရားဓမ္မတွေဟာ
ကျင့်ရင် ကျင့်တဲ့အတိုင်း
ဖြစ်နိုင်စွမ်းရှိတယ်” ဆိုတဲ့
ဓမ္မစွမ်းရည်အပေါ်မှာ အလေးထားပြီး
အကုသိုလ်တွေ ဖယ်ရှားကာ
ကုသိုလ်တွေ တိုးပွါးအောင်
ကြိုးစားကြရမယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၁၄။ နှစ်ဦးမေတ္တာ လူတိုင်းမှာ
****************************************
တစ်နှစ်တာကာလပတ်လုံး
ပြောသမျှ ဆိုသမျှ စိတ်ကူးသမျှတွေဟာ
မေတ္တာနဲ့ လုပ်ဆောင်သွားကြမယ်ဆိုရင်
အားလုံးအတွက်
အကျိုးဖြစ်ထွန်းမယ်ဆိုတာ
သေချာပါတယ်။
လူတိုင်းရဲ့ နှလုံးသားမှာ
မေတ္တာတရား ကိန်းဝပ်နေအောင်
ကြိုးစားရမယ်။
မေတ္တာဆိုတဲ့တရားဟာ
လူတွေရဲ့နှလုံးသားမှာ
အခြေခံအားဖြင့် ပါရှိနေသော်လည်း
တိုးတက်လာအောင် မလုပ်ဘူးဆိုရင်
မေတ္တာအကျိုးဟာ
သက်ရောက်မှာ မဟုတ်ပါဘူး။
မေတ္တာတရားနဲ့ ဆက်ဆံခြင်းဟာ
လူမျိုးမရွေး ဘာသာမရွေးအတွက်
အဆင်ပြေချောမွေ့စေတယ်၊
ဘယ်ပုဂ္ဂိုလ်ပဲဖြစ်ဖြစ်
မေတ္တာနဲ့ဆက်ဆံနေရင်
ကိုယ့်ရဲ့ရင်ထဲ နှလုံးသားထဲမှာ
အပြစ်ကင်းပြီး
အကုသိုလ် မဖြစ်တော့ဘူးပေါ့။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
