တရားပလ္လင်ထက်က စကားအလင်္ကာများ (၃၀-၃၁-၃၂)
၃၀။ ဟောသူနာသူ စိတ်ထားဖြူ
****************************************
ဓမ္မပူဇာဆိုတာ
လှူချင်တဲ့စေတနာရှိတဲ့ပုဂ္ဂိုလ်သာ လှူပါ
“လှူကြပါ ဒါန်းကြပါ” လို့
ပြောစရာ မလိုဘူး၊
လှူချင်လို့ရှိရင် လှူချင်တဲ့ပုဂ္ဂိုလ်တွေ
အဆင်ပြေအောင် အလှူလက်ခံတဲ့
နေရာလေးသာ ရှိသင့်တယ်၊
အလှူခံဖလားဆိုတာကို မထားသင့်ဘူး၊
တစ်ချို့ဆို လမ်းပိတ်ပြီးတော့တောင်
အလှူခံကြတာ။
တရားပွဲကျင်းပတယ်ဆိုတာ
အင်မတန်မှ ကုသိုလ် ရပါတယ်၊
တရားနာခွင့်ရအောင် ဖန်တီးပြီး
လုပ်ဆောင်ပေးတယ်ဆိုတာ
အင်မတန်ကောင်းတဲ့ ကုသိုလ်တစ်ခုပဲ၊
အင်မတန်မွန်မြတ်တဲ့
ကုသိုလ်ကိုလုပ်ရာမှာ
လုပ်ပုံလုပ်နည်း
မမှန်သည့်အတွက်ကြောင့်
အပြစ်တွေဖြစ်လာတယ်ဆိုရင်
မကောင်းဘူးပေါ့၊
ဒီတော့ “သန့်သန့်ရှင်းရှင်း
ဖြစ်အောင်လုပ်ဖို့
အင်မတန်အရေးကြီးတယ်” ဆိုတဲ့
သတိတရား ရှိသင့်ပါတယ်။
တရားဟောတဲ့ပုဂ္ဂိုလ်ကလည်း
စိတ်ထားဖြူစင်ရမယ်၊
တရားနာတဲ့ပုဂ္ဂိုလ်ကလည်း
စိတ်ထားဖြူစင်ရမယ်၊
နှစ်ဦးနှစ်ဝ စိတ်ထားဖြူပြီး
တရားဟောကြ နာကြမယ်ဆိုရင်
မိမိတို့ ရည်ရွယ်ချက်ဖြစ်တဲ့
တရားဓမ္မကို သိရှိခြင်း ကျင့်သုံးခြင်းဖြင့်
သံသရာဝဋ်ဆင်းရဲက
ထွက်ပေါက်ကို ရရှိကြမှာ ဖြစ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၃၁။ သေချာသောလမ်းမှ လျှောက်လမ်းပါ
****************************************
တရားဓမ္မနှင့်ပတ်သက်ပြီး
လွဲချော်မှုမရှိတဲ့ အကျင့်ကို
ကျင့်ကြံကြိုးကုတ် အားထုတ်ပြီး
မလွဲတဲ့လမ်းက လျှောက်တာကို
သေချာတဲ့လမ်းက
လျှောက်တယ်လို့ ဒီလိုပြောတာ။
မြတ်စွာဘုရားက နိဗ္ဗာန်ခရီးကို
လျှောက်လှမ်းတဲ့ ပုဂ္ဂိုလ်တွေမှာ
သေချာတဲ့လမ်းဆိုတာ ရှိတယ်၊
အင်္ဂုတ္တရနိကာယ်မှာ
‘အပဏ္ဏက ပဋိပဒါ' ဆိုပြီး
ဟောထားတယ်။
နိဗ္ဗာန်လမ်းမပေါ် တက်ပြီး
တရားထူးတရားမြတ်ကို ရချင်တယ်၊
(သို့မဟုတ်) သံသရာခရီးမှာ
ဖြောင့်တန်းတဲ့လမ်းကို
သွားချင်တယ်ဆိုရင်
‘အပဏ္ဏကကျင့်စဉ်’ ဆိုတဲ့
အဲဒီလမ်းကြောင်းဟာ
တစ်ခုတည်းသော သေချာသောလမ်းပဲ။
အပဏ္ဏကကျင့်စဉ်ဆိုသည်မှာ -
၁။ ဣန္ဒြိယသံဝရ =
ဣန္ဒြေကို စောင့်ထိန်းခြင်း။
၂။ ဘောဇနမတ္တညူ =
အစားအစာနှင့်ပတ်သက်ပြီး
အတိုင်းအတာပမာဏကို သိခြင်း။
၃။ ဇာဂရိယာနုယောဂ =
တရားဓမ္မနှင့်ပတ်သက်ပြီး
နိုးနိုးကြားကြား ရှိခြင်း ဆိုတဲ့
ဒီ “အပဏ္ဏက ပဋိပဒါ" ဟာ
သေချာတဲ့လမ်းပဲ ဖြစ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၃၂။ ဘဝအသွင်ကို ဓမ္မအမြင်ဖြင့် ရှုကြည့်ခြင်း
******************************************
လူတိုင်းလူတိုင်း ဘဝတစ်ခုစီ
ရရှိထားကြလို့ လူတိုင်းလူတိုင်းမှာ
ကိုယ်စီဘဝကလေးတွေ ရှိနေကြတယ်၊
သို့သော် ဘဝနဲ့ပတ်သက်ပြီးတော့
တစ်ဦးနှင့်တစ်ဦး
အမြင်ချင်း မတူကြပေဘူး၊
တစ်ချို့က ဘဝကို
ပျော်စရာလို့ မြင်ကြတယ်၊
တစ်ချို့က ဘဝကို
ငြီးငွေ့စရာလို့ မြင်ကြတယ်။
လောကကြုံတွေ့ရာမှာ
အကောင်းချည်းလည်း မဟုတ်သလို
အဆိုးချည်းပဲတော့လည်း မဟုတ်ဘူး၊
“အဿာဒ” လို့ ဆိုတဲ့ သာယာစရာတွေ
နှစ်သက်စရာတွေ ရှိသလို
‘အာဒီနဝ’ လို့ ဆိုတဲ့ အပြစ်တွေ
ငြီးငွေ့စရာတွေလည်း ရှိတယ်။
ဒီနှစ်ခုကို ခွဲခွဲခြားခြား ကွဲကွဲပြားပြား
သိမြင်တာမှ ‘ဓမ္မအမြင်’ လို့ ပြောရမယ်၊
realism ပေါ့၊
ဒါကြောင့်မို့ ဘဝအသွင်ကို
အမြင်အမျိုးမျိုးနဲ့ ကြည့်တဲ့အခါမှာ
ဓမ္မအမြင်နဲ့ ကြည့်ဖို့ လိုပါတယ်။
ဓမ္မဆိုတာ အမှန်တရားကို ပြောတာ၊
The Law of Nature ပေါ့၊
“ဓမ္မ” ဆိုတဲ့ စကားလုံးကိုက
“အတ္တနော သဘာဝံ ဓာရေတီတိ ဓမ္မော”
သူ့သဘာဝအတိုင်း သူဖြစ်နေတာကို
‘ဓမ္မ’ လို့ ဒီလိုပြောတာ။
ဘဝရဲ့အသွင်ကို
ဓမ္မအမြင်နဲ့ ကြည့်တဲ့အခါ
လူတိုင်းလူတိုင်းမှာ
ကိုယ်စီရထားတဲ့ဘဝလေးတွေဟာ
ဘယ်လိုအခြေအနေ ရှိသလဲလို့
ဆန်းစစ်ပြီး ကြည့်ရမယ်၊
ကိုယ်ရထားတဲ့ ဘဝရဲ့ အခြေအနေ
ကိုယ်မသိဘူးဆိုရင် ဒီပုဂ္ဂိုလ်လောက်
နမော်နမဲ့နိုင်တာ မရှိတော့ဘူး၊
ဒါ့ကြောင့် ကိုယ့်ရဲ့ အခြေအနေ
ဘဝအသွင်အပြင်ကို
ဓမ္မအမြင်နဲ့ ရှုကြည့်ပြီး
အမှန်သိအောင် အားထုတ်ပါ။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
