တရားပလ္လင်ထက်က စကားအလင်္ကာများ (၄၈-၄၉-၅၀)
၄၈။ ဘဝဆည်းဆာ ကရုဏာ
****************************************
ဘဝ‘ဆည်းဆာ’ဆိုတာ
နေဝင်ချိန်ကာလလေးကို
ခေါ်တာဖြစ်တယ်၊
ပုဂ္ဂိုလ်သတ္တဝါ အားလုံးတို့ရဲ့
ဘဝမှာလည်းပဲ ဆည်းဆာနေဝင်ချိန်
(သို့မဟုတ်) နောက်ဆုံးနေ့ဆိုတာ ရှိတယ်၊
ဘဝဆည်းဆာအချိန် ရောက်လာတဲ့
ပုဂ္ဂိုလ်တစ်ယောက်ဟာ
နေဝင်တော့မယ့်ဆဲဆဲမှာ
မသိတဲ့ခရီးတစ်ခုကို သွားရမှာမို့လို့
စိုးရိမ်သောက ရောက်နေရတယ်။
‘ကရုဏာ’ဆိုတာ
ဒုက္ခိတသတ္တဝါ (သို့မဟုတ်)
အခက်အခဲကြုံနေတဲ့
ပုဂ္ဂိုလ်တစ်ယောက်ကို မြင်ရရင်
မြင်သူမှာ ခံစားရတဲ့
နှလုံးသားရဲ့လှုံ့ဆော်မှု၊
စိတ်နှလုံးကို ငြိမ်အောင်ထားလို့မရဘဲ
တစ်ဖက်သား ဒုက္ခရောက်နေတာကို
မကြည့်နိုင် မရှုနိုင် ကူညီဖြေရှင်းလိုတဲ့
သဘာဝတရားဟာ ကရုဏာဖြစ်တယ်။
ဒါကြောင့် “ကျန်းမာရေးနဲ့
လူမှုကူညီရေး' ဆိုတဲ့ ဒီအရေးနှစ်ခုဟာ
ကရုဏာကို အခြေခံပြီးတော့
လုပ်တဲ့အရေးတွေဖြစ်လို့
ဘဝဆည်းဆာမှာ
အင်မတန်မှ အရေးပါတဲ့
ကရုဏာတရားဖြစ်တယ်၊
မြင့်မြတ်တဲ့ နှလုံးသားရှိတဲ့
ပုဂ္ဂိုလ်တိုင်းဟာ ကရုဏာထားပြီး
အများရဲ့ ဒုက္ခကို ဝိုင်းဝန်းကူညီ
ဖြည့်ဆည်းပေးတယ်ဆိုတာ
အင်မတန်မှ မွန်မြတ်လှပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၄၉။ ဘဝခရီးဝယ် ရွေးချယ်ရမယ့်လမ်း
****************************************
ဒီကနေ့ခေတ်မှာ ကိုးကွယ်ရာ
ဘာသာတရားတွေက အမျိုးမျိုးရှိတယ်၊
ဘာသာတရား တစ်ခုနဲ့တစ်ခု
ယုံကြည်ချက်တွေ ဟောပြောချက်တွေ
ကွဲပြားခြားနားနေတယ်၊
ဘာသာတစ်ခုက အမှန်ပြောတဲ့အရာဟာ
အခြားဘာသာတစ်ခုမှာ
အမှားဖြစ်နေပြန်တယ်။
အဲဒီလို အမှားအမှန်ရွေးချယ်ဖို့
ခက်နေတဲ့ ပုဂ္ဂိုလ်တွေအတွက်
လျှောက်လှမ်းစရာလမ်းကြောင်းကို
ဗုဒ္ဓမြတ်စွာက “ကာလာမ”သုတ်မှာ
ဟောထားခဲ့ပါတယ်၊
ဒီကာလာမသုတ်ကို
ခြုံငုံကြည့်မယ်ဆိုရင်-
၁။ အစဉ်အလာယုံကြည်မှုစသည့်
အချက်(၁၀)ချက်ကို
အခြေခံပြီး မမှတ်ယူရ။
၂။ ကိုယ်ပိုင်ဉာဏ် ကိုယ်ပိုင်အသိကိုသာ
အခြေခံရမည်။
၃။ ကိုယ်ပိုင်ဉာဏ်ဖြင့် အဖြေထုတ်ပြီး
မှားတာကိုစွန့်၍ မှန်တာကို
လက်ခံကျင့်သုံးရမည်။
၄။ ဖြူစင်သောစိတ်
မြင့်မြတ်သော သဘောထားဖြင့်
အများနှင့် ဆက်ဆံနေထိုင်ရမည်။
၅။ ကိုယ်ပိုင်ဉာဏ်ဖြင့်
အဖြေမထုတ်နိုင်သော ပြဿနာများ၌
နှစ်ဖက်ကောင်းပြီး
သေချာသည့်လမ်းကို ရွေးရမည်။
ဒါကြောင့် ...
ဗုဒ္ဓမြတ်စွာရွေးချယ်ပေးထားတဲ့
သေချာတဲ့လမ်းကြောင်းကို
လျှောက်လှမ်းပြီး နိဗ္ဗာန်ချမ်းသာကို
မျက်မှောက်ပြုနိုင်ကြပါစေ။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၀။ နိုင်သူနှင့် ရှုံးသူ
****************************************
လောကလူတွေမှာ
အနိုင်အရှုံး သတ်မှတ်တဲ့နေရာ
အယူအဆချင်း မတူညီကြဘူး၊
လောကရှုထောင့်က ကြည့်တဲ့အခါ
အနိုင်လို့ ထင်ရပေမယ့်လို့
ဓမ္မရှုထောင့်က ကြည့်တဲ့အခါ
အရှုံးဖြစ်နေတာတွေ တွေ့ရတယ်၊
မြတ်စွာဘုရားက အနိုင်ယူနည်း
၄-မျိုး ဟောထားတာ ရှိတယ်။
၁။ အက္ကောဓေန ဇိနေ ကောဓံ -
ဒေါသခက်ထန်နေတဲ့
ပုဂ္ဂိုလ်တစ်ယောက်ကို
မိမိက ဒေါသခက်ထန်ခြင်းမပြု
သည်းခံခြင်း မေတ္တာထားခြင်း
အေးငြိမ်းတဲ့စိတ်ဓာတ်မျိုးဖြင့်
အနိုင်ယူပါ။
၂။ အသာဓု သာဓုနာ ဇိနေ -
မကောင်းတာလုပ်တဲ့
ပုဂ္ဂိုလ်တစ်ယောက်ကို
သူနဲ့အတုလိုက်ပြီး
မကောင်းတာ မလုပ်ဘဲ
ကိုယ်က ကောင်းတာကို လုပ်ပြီး
အနိုင်ယူပါ။
၃။ ဇိနေ ကဒရိယံ ဒါနေန -
နှမြောတဲ့ပုဂ္ဂိုလ်တစ်ယောက်ကို မိမိက
ပေးကမ်းစွန့်ကြဲခြင်းဖြင့် အနိုင်ယူပါ။
၄။ သစ်စနောလိကဝါဒိနာ -
မမှန်တာကို အမြဲပြောနေတဲ့
ပုဂ္ဂိုလ်တစ်ယောက်ကို
မိမိက မှန်တာကိုသာ
ပြောခြင်းဖြင့် အနိုင်ယူပါ။
ဒါကြောင့် လောကအမြင်နဲ့ကြည့်ရင်
‘နိုင်သူနဲ့ ရှုံးသူ' ဟာ ပုံစံတစ်မျိုးစီ
မြင်ရမှာ ဖြစ်သော်လည်း
ဓမ္မအမြင်နဲ့ကြည့်မှ နိုင်သူအစစ်နဲ့
ရှုံးသူအစစ်ကို မြင်တွေ့ကြရမှာပါ။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
