တရားပလ္လင်ထက်က စကားအလင်္ကာများ (၅၁-၅၂-၅၃)
၅၁။ လူဆိုး လူမိုက်
****************************************
အမူအကျင့် ဆိုးသွမ်းတဲ့ပုဂ္ဂိုလ်မျိုးကို
‘လူဆိုး’လို့ ခေါ်ကြတယ်၊
ကြောင်းကျိုးဆင်ခြင်နိုင်မှုမရှိ
အသိဉာဏ်မဲ့ပြီး အမှန်မသိလို့
မိုက်ကန်းနေသူကို ‘လူမိုက်’လို့ ခေါ်တယ်။
လောကမှာ ဆိုးသွမ်းပြီးတော့
အကြောင်းအကျိုး ဆင်ခြင်မှုမရှိ
အသိဉာဏ်မရှိသည့်အတွက်
လုပ်သင့်, မလုပ်သင့်ကို ခွဲခြားမသိဘူး၊
မသိသည့်အတွက် လုပ်ချင်ရာရာတွေကို
လုပ်နေတဲ့ပုဂ္ဂိုလ်ကို “လူဆိုးလူမိုက်’လို့
မြန်မာစကားအရ သရုပ်ဖေါ်လို့ ရတယ်။
လူဆိုးလူမိုက်တွေဟာ -
===============================
၁။ ဒုစ္စိန္တိတ စိန္တီ - ကောင်းတာဘယ်တော့မှ
စိတ်မကူးဘူး၊
လူတကာဒုက္ခပေးမယ့်
စိတ်ကူးပဲ ကူးတယ်။
၂။ ဒုဗ္ဘာသိတဘာသီ - ကောင်းတဲ့စကား
မပြောဘူး၊
အများဒုက္ခရောက်မယ့်
မကောင်းတဲ့စကားပဲ
ပြောတယ်။
၃။ ဒုက္ကဋကမ္မကာရီ - လုပ်တဲ့အခါမှာလည်း
မကောင်းတဲ့
အလုပ်ကိုပဲ လုပ်တယ်။
ဒါတွေဟာ လူဆိုးလူမိုက်ရဲ့
သွင်ပြင်လက္ခဏာတွေ ဖြစ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၂။ ဆင်းရဲမွဲတေမှု လျော့ချရေး
***************************************
လောကမှာ ပစ္စည်းဥစ္စာတွေ
ရှားပါးပြီး မွဲတေလာလို့ရှိရင်
လူ့လောကမှာ ပြဿနာမျိုးစုံတက်ပြီး
ဒုက္ခရောက်ရသလိုပဲ
ဓမ္မရေးရာနဲ့ပတ်သက်ပြီး
ဆင်းရဲမွဲတေမှုတွေ များလာမယ်ဆိုရင်
ဒီလိုဒုက္ခကြုံရတာပဲ။
ကိုယ့်သန္တာန်မှာ ရှိသင့်တဲ့တရားတွေ
ဓမ္မအရည်အချင်းတွေ မရှိဘူးဆိုရင်
အဲဒီလူဟာ လူမွဲပဲ၊
ရှိသင့်တဲ့တရားတွေက
ကံ,ကံ၏အကျိုးကို ယုံကြည်မှု၊
ကုသိုလ်ကောင်းမှုအပေါ်မှာ
စိတ်ဝင်စားမှု သဒ္ဓါ။
မဟုတ်တာလုပ်ရမှာကို
ရှက်ရွံ့တဲ့ ဟိရီ။
မကောင်းမှု အကုသိုလ်ကို
ကြောက်ရွံ့တဲ့ ဩတ္တပ္ပ။
အကုသိုလ်တွေ ဖယ်ရှားပြီး
ကုသိုလ်တွေ ရအောင်လုပ်တဲ့ ဝီရိယ။
အကောင်းအဆိုးကို
ခွဲခြားသိနိုင်တဲ့ ပညာ။
ဒီတရားတွေ မရှိရင် ဆင်းရဲမွဲတေပြီတဲ့၊
ဒါကြောင့်မို့ မိမိတို့ဟာ
ဆင်းရဲမွဲတေမှုဆိုတာကို မဖြစ်စေရဘူး၊
ဥစ္စာဓန ဆင်းရဲမွဲတေမှုဟာ
တစ်ဘဝသာ ခံရတယ်၊
ကုသိုလ်ရေးနဲ့ပတ်သက်တဲ့ သဒ္ဓါ,
ဟိရီ, ဩတ္တပ္ပ, ဝီရိယ, ပညာလို့ဆိုတဲ့
အရေးကြီးတဲ့တရားတွေ
ဆင်းရဲမွဲတေမှု မဖြစ်အောင်
လျော့ပါးသွားအောင်
ဆောင်ရွက်ကြဖို့ လိုပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၃။ မွေးနေ့လက်ဆောင်
***************************************
မွေးနေ့မှာ ကောင်းမြတ်တဲ့
ကုသိုလ်တရားတွေ
ဆည်းပူးအားထုတ်မယ်ဆိုရင်
“မွေးနေ့ကိုယ်တိုင်က
တန်ဖိုးမရှိသော်လည်း
မွေးနေ့ကို အကြောင်းပြုပြီးတော့
ရလာတဲ့တရားတွေဟာ
တန်ဖိုးရှိပါတယ်”လို့
ခွဲခြားသိဖို့ လိုတာပေါ့။
ဆိုလိုတာက
မွေးဖွါးလာခြင်းဟာ မကောင်းဘူး၊
မကောင်းတဲ့ထဲကမှ
အကောင်းကဘာလဲဆိုရင်
မိမိသန္တာန်မှာ ဖြစ်ပေါ်လာတဲ့
ကုသိုလ်တရားတွေက ကောင်းတယ်၊
အများကို အကျိုးပြုနိုင်တဲ့
အလုပ်တွေက ကောင်းတယ်၊
ကိုယ့်ကိုယ်အမှီပြုပြီးတော့
အများချမ်းသာတယ်ဆိုရင်
ကောင်းတယ်၊
အဲဒီကောင်းတာတွေ များများရမှ
တို့တစ်တွေဟာ ကြီးမားတဲ့
အကျိုးကျေးဇူးကို ရမှာဖြစ်ပါတယ်၊
ဒီတော့ ‘ဇာတိ’ဆိုတဲ့ မွေးဖွါးခြင်း
(မွေးနေ့)ကို အရင်းတည်ပြီးတော့
ပါရမီကုသိုလ်တွေဖြစ်အောင်
လုပ်လို့ ရတယ်။
ဒါကြောင့်မို့ ...
happy birthday to you လို့ ဆိုပြီးတော့
ဘာနဲ့ happy ကြမှာလဲ၊
မွေးနေ့တိုင်း မွေးနေ့တိုင်းမှာ
ကုသိုလ်ကောင်းမှုတွေ လုပ်ပြီးတော့
ရလာတဲ့ ကုသိုလ်တရားသည်သာလျှင်
မွေးနေ့ရဲ့အမြတ်ဖြစ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
