တရားပလ္လင်ထက်က စကားအလင်္ကာများ (၅၄-၅၅-၅၆)
၅၄။ စရိုက်နှင့် ဝါသနာ
***************************************
စိတ်ထဲမှာ အဖြစ်များနေတဲ့အရာတစ်ခု၊
လူတွေရဲ့ စိတ်နေသဘောထား
ပကတိအနေအထား
ဥဿန္နတာ အဖြစ်များတဲ့
စိတ်အခြေအနေကို
“စရိုက်”လို့ ခေါ်တယ်။
ဒီနေရာမှာ စာပေကျမ်းဂန်အရ
စရိုက် (၆)မျိုး ရှိတယ်၊
ကောင်းတဲ့စရိုက် (၃)မျိုးနဲ့
မကောင်းတဲ့စရိုက် (၃)မျိုး၊
ဒီစရိုက်တွေက ကမ္မဋ္ဌာန်းအလုပ်
အားထုတ်တဲ့အခါ အရေးကြီးတယ်၊
အကုသိုလ်နဲ့ပတ်သက်တဲ့
စရိုက် (၃)မျိုးက ရာဂစရိုက်
ဒေါသစရိုက် မောဟစရိုက်၊
ကုသိုလ်နဲ့ပတ်သက်တဲ့ စရိုက် (၃)မျိုးက
သဒ္ဓါစရိုက် ဗုဒ္ဓိစရိုက် ဝိတက္ကစရိုက်
ဆိုပြီး (၃)မျိုးရှိတယ်။
ဝါသနာဆိုတာကျ အထုံရနေခြင်း
အကျင့်ပါနေခြင်း ဝါသနာဖြင့်
ထုံမွမ်းခြင်းလို့ အဓိပ္ပါယ်ရတယ်၊
စရိုက်ဆိုတာ အဖြစ်များတဲ့အရာ၊
အဲဒီအဖြစ်များတဲ့အရာတွေက
ဖြစ်ပါများလွန်းအားကြီးလာတဲ့အခါမှာ
မပျောက်နိုင်လောက်အောင်
စွဲသွားပြီဆိုလို့ရှိရင် ဒါ ဝါသနာ။
တစ်ချို့က အဲဒီစရိုက်တွေဟာ
အတိတ်ဘဝက လေ့ကျင့်ခဲ့တာနဲ့
သက်ဆိုင်တယ်တဲ့၊
အဲဒီအဖြေကို ရှင်မဟာဗုဒ္ဓဃောသ က
“ဒါ မသေချာဘူး ယေဘုယျစကားပဲ၊
အတိတ်ဘဝတုန်းက
ကံတစ်ခုခုကိုလုပ်နေတဲ့
စိတ်နေသဘောထားကို ကြည့်ရမယ်၊
ပဋိသန္ဓေကို ဖြစ်စေတတ်တဲ့
ကံတရားဟာ
စရိုက်တွေဖြစ်ပေါ်လာခြင်းရဲ့
အဓိကအကြောင်းဖြစ်တယ်” လို့
ဆိုလိုတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၅။ ချမ်းသာစွာ အိပ်စက်ရခြင်း
***************************************
တိုက်ခန်းထဲမှာအိပ်နေတဲ့ပုဂ္ဂိုလ်မှာ
ရာဂစိတ်တွေ ဒေါသစိတ်တွေ
ဖြစ်ပွါးလာလို့ရှိရင်
စိတ်နှလုံးဟာ ပူပန်လာလိမ့်မယ်၊
တဏှာရာဂဆိုတာ အလိုမကျဘူး,
စိတ်နှလုံးကို ပူပန်စေတယ်၊
ကိုယ်ဆင်းရဲမှု စိတ်ဆင်းရဲမှုကို
ဖြစ်စေတယ်၊
အဲဒီအပူတွေ ရှိနေမယ်ဆိုရင်
ဘယ်လောက်ကောင်းတဲ့
အိပ်ယာပေါ်အိပ်အိပ်
ချမ်းချမ်းသာသာ
အိပ်စက်တယ်ဆိုတာ မဖြစ်နိုင်ပါဘူး။
မြတ်ဗုဒ္ဓဆိုလိုတဲ့
ချမ်းသာစွာအိပ်စက်ရခြင်းဆိုသည်မှာ
နှလုံးသားအပူငြိမ်းပြီးတော့
ကိလေသာခပ်သိမ်း
ငြိမ်းနေတဲ့ ပုဂ္ဂိုလ်ရဲ့
အိပ်စက်မှုသာလျှင်
ချမ်းချမ်းသာသာ
အိပ်စက်ရခြင်းလို့ ဆိုနိုင်တယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၆။ ရင်းနှီးမြှုပ်နှံခြင်း
***************************************
ကုသိုလ်ကောင်းမှုပြုတယ်ဆိုတာ
ရင်းနှီးမြှုပ်နှံခြင်းတစ်မျိုး ဖြစ်ပါတယ်၊
သေချာတဲ့ရင်းနှီးမြှုပ်နှံမှုကို
မြတ်ဗုဒ္ဓက ယခုလို ရှင်းပြတယ်၊
လိမ္မာပါးနပ်တဲ့ ပုဂ္ဂိုလ်တစ်ယောက်ဟာ
တကယ်စိတ်ချရတဲ့
ရင်းနှီးမြှုပ်နှံမှုကို လုပ်ချင်ပြီဆိုရင်
မိမိပိုင်ဆိုင်တဲ့ပစ္စည်းကို
အကြောင်းပြုပြီး ကုသိုလ်ပြုကာ
ဒါနကောင်းမှုလုပ်တာ
ကိုယ်ကျင့်တရား
ထိန်းသိမ်းစောင့်ရှောက်ခြင်း၊
သမာဓိတရား ကြိုးစားအားထုတ်ခြင်း၊
လောကီ လောကုတ္တရာ ပညာရပ်တွေ
မိမိသန္တာန်မှာရအောင်
ကြိုးစားအားထုတ်ခြင်းဟာ
သေချာတဲ့ ရင်းနှီးမြှုပ်နှံမှု
ဖြစ်ပါတယ်တဲ့။
စီးပွါးရေးနဲ့ပတ်သက်ပြီး
လမ်းညွှန်ချက်ကတော့
မိမိရှိတဲ့ပစ္စည်းကို လေးပုံပုံ၊
တစ်ပုံက emergency အတွက် သိမ်းထား၊
တစ်ပုံကို စား၊ ကျန်တဲ့တစ်ပုံကိုတော့
အတိုးအပွါးရအောင်
အရောင်းအဝယ်ကိစ္စတွေမှာ
ဆောင်ရွက်သင့်တယ်လို့
ဩဝါဒပေးထားတယ်၊
ဒါက လောကမှာ လူတွေ
ဒုက္ခမရောက်အောင် လမ်းညွှန်ထားတဲ့
စီးပွါးရေးစီမံချက်တစ်ခု ဖြစ်တယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
