တရားပလ္လင်ထက်က စကားအလင်္ကာများ (၅၇-၅၈-၅၉)
၅၇။ ကမ္မဋ္ဌာန်းဆရာ
***************************************
နိဗ္ဗာန်ရောက်ချင်တဲ့ပုဂ္ဂိုလ်တိုင်း
ကမ္မဋ္ဌာန်းတရား အားထုတ်တဲ့အခါ
မှန်ကန်တဲ့လမ်းကြောင်းပေါ်
လျှောက်နိုင်ဖို့အတွက်
အရည်အချင်းရှိတဲ့ ကမ္မဋ္ဌာန်းဆရာကို
ရှာတွေ့ဖို့ အရေးကြီးတယ်၊
ဘယ်လိုအရည်အချင်းနဲ့ ပြည့်စုံမှ
“ကမ္မဋ္ဌာန်းဆရာ” ဖြစ်ရမှာလဲဆိုတာ စာပေကျမ်းဂန်မှာ မှတ်တမ်းတင်ထားတာရှိတယ်။
၁။ ပိယော စ ဟောတိ မနာပေါ = ကိုယ်ကျင့်သီလနဲ့ ပြည့်စုံပြီး ကြည်ညိုစရာကောင်းရမယ်၊ အပြစ်အနာအဆာ မရှိစေရဘူး။
၂။ ဂရု = ကြည်ညိုစရာကောင်းရုံတင်မကဘူး၊ လေးစားလောက်တဲ့ ဂုဏ်အရည်အချင်းတွေလည်း ရှိရမယ်။
၃။ ဘာဝနီယော = အများကလည်း တော်လိုက်တာလို့ ချီးမွမ်းထိုက်တဲ့ ဂုဏ်အရည်အချင်းလည်း ရှိရမယ်။
၄။ ဝတ္တာ = မိမိနဲ့ပတ်သက်လာတဲ့ပုဂ္ဂိုလ်ကို ပြောသင့်ပြောထိုက်တဲ့ စကားဆိုရင် ပြောကို ပြောရမယ်။
၅။ ဝစနက္ခမော = တစ်ဖက်ကနေ ထောက်ပြပြောဆိုလာလို့ရှိရင် လက်ခံနိုင်တဲ့ပုဂ္ဂိုလ်၊ သည်းခံနိုင်တဲ့ပုဂ္ဂိုလ် ဖြစ်ရမယ်။
၆။ ဂမ္ဘီရဉ္စ ကထံ ကတ္တာ = လေးနက်တဲ့ ရုပ်နာမ်အကြောင်းမဂ် ဖိုလ် နိဗ္ဗာန်အကြောင်းများ ဟောပြောနိုင်ရမယ်။
၇။ နော စ အဋ္ဌာနေ နိယောဇေတိ = အရာမဟုတ်တဲ့ကိစ္စ မမှန်ကန်တဲ့လမ်းကြောင်းပေါ် တွန်းမတင်ဘူး၊ ဒီအရည်အချင်းတွေပြည့်စုံမှ ကမ္မဋ္ဌာန်းဆရာကောင်းလို့ သတ်မှတ်ရမယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၈။ သာသနာပြု စွမ်းအားစု
***************************************
သာသနာဆိုတာ
ဗုဒ္ဓမြတ်စွာဟောကြားတဲ့
တရားတော်တွေကို
ရည်ညွှန်းတာ ဖြစ်ပေမယ့်လို့
အဓိကက ဘာတွေလဲဆိုရင်
မဂ္ဂင်ရှစ်ပါးတရားကို
သာသနာလို့ ခေါ်တယ်၊
‘မဇ္ဈိမပဋိပဒါ' လို့ ခေါ်တဲ့
အလယ်လမ်းမဂ္ဂင်ရှစ်ပါးကို
သာသနာလို့သတ်မှတ်တယ်၊
ဒီထက်နည်းနည်း
အကျယ်ချဲ့ကြည့်လိုက်မယ်ဆိုရင်
ထိုမဂ္ဂင်ရှစ်ပါးထဲမှာ အကြုံးဝင်တဲ့
သတိပဋ္ဌာန်စတဲ့
ဗောဓိပက္ခိယတရား (၃၇)ပါးဟာ
ဗုဒ္ဓမြတ်စွာရဲ့ သာသာနာပါလို့
ဒီလိုမှတ်ရမယ်။
အဲဒီတော့ သာသနာပြုတယ်ဆိုတာ
ဗုဒ္ဓဟောကြားတဲ့ တရားဓမ္မတွေကို
သင်ယူခြင်းနဲ့ ထိုတရားဓမ္မတွေအတိုင်း
လိုက်နာကျင့်သုံးခြင်းကို ခေါ်တယ်၊
ဒါဟာ တကယ့်အစစ်အမှန်
သာသနာပြုတာပဲ၊
ကျန်တဲ့ ဘုရားတည်တာ
ကျောင်းဆောက်တာတွေဟာ
သာသနာပြုနိုင်အောင်
အထောက်အပံ့ပေးတဲ့
အကူအညီတွေသာ ဖြစ်တယ်၊
ဒီလိုအထောက်အပံ့ အကူအညီတွေ
မပေးလို့ရှိရင်လည်းပဲ
သာသနာပြုနိုင်တဲ့အဆင့်ကို
မရောက်နိုင်ပါဘူး။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၅၉။ သုံးပါးရတနာ ကိုးကွယ်ရာ
***************************************
မိရိုးဖလာ ဗုဒ္ဓဘာသာဝင်ဖြစ်လာကြတဲ့
ပုဂ္ဂိုလ်တွေက အများလုပ်လို့
လိုက်လုပ်နေကြတာ များတယ်၊
ကိုယ်ပိုင်ဉာဏ်နဲ့စဉ်းစားပြီး
အလေးအနက်လုပ်တာ နည်းတယ်၊
လေးနက်မှုမရှိသည့်အတွက်ကြောင့်
တစ်ချို့ မြန်မာလူမျိုးတွေရဲ့ အိမ်မှာ
ရတနာသုံးပါးတင်မကဘူး၊
တခြားနတ်တွေပါ ရောက်လာကြတယ်၊
ဒါဟာ လေးနက်မှုမရှိလို့ ဖြစ်ရတာ။
မြတ်ဗုဒ္ဓက ဟောတယ်၊
“သုခေါ ဗုဒ္ဓါနမုပ္ပါဒေါ် ”
လောကမှာ ဗုဒ္ဓလို့ခေါ်တဲ့
အမှန်တရားသိတဲ့ပုဂ္ဂိုလ်
ပေါ်ထွန်းလာတာဟာ သတ္တဝါတွေ
ချမ်းသာဖို့အတွက်ပဲတဲ့၊
ဗုဒ္ဓက သတ္တဝါတွေ ဒုက္ခကလွတ်ပြီး
ချမ်းသာသုခရအောင်
တန်ခိုးတော်နဲ့ မ,စ ကယ်တင်သလား
ဆိုတော့ မဟုတ်ပါဘူး၊
မ,စ ကယ်တင်ဖို့ ဖြစ်နိုင်မဖြစ်နိုင်
စဉ်းစားကြည့်ပေါ့။
မိမိသန္တာန်မှာ ဖြစ်လာတဲ့
ကုသိုလ်တရားကသာလျှင်
ကယ်တင်နိုင်တဲ့အရာ ဖြစ်တယ်၊
ဒီသဘောတွေကို ဆင်ခြင်စဉ်းစားပြီး
ဗုဒ္ဓဘာသာဝင် သူတော်စင်တွေအနေနဲ့
မှန်ကန်တဲ့ရည်ရွယ်ချက်နဲ့
စစ်မှန်တဲ့ကိုးကွယ်မှုရှိဖို့
အင်မတန်မှ အရေးကြီးပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
