တရားပလ္လင်ထက်က စကားအလင်္ကာများ (၆၀-၆၁-၆၂)
၆၀။ သမုဒ္ဒရာ ဝမ်းတစ်ထွာ
**************************************
လူ့ဘဝရောက်လာတဲ့
လူသားတွေအနေနဲ့ နေ့စဉ်နဲ့အမျှ
အာဟာရတွေ စားကြရတယ်၊
တစ်ရက်လည်း မပြီးနိုင်
နှစ်ရက်လည်း မပြီးနိုင်၊
တစ်သက်လုံး ဖြည့်တင်းနေကြရလို့
လူတွေရဲ့တစ်ထွာတစ်မိုက်လောက်ရှိတဲ့
ဝမ်းဗိုက်လေးဟာ
ပင်လယ်သမုဒ္ဒရာကြီးလောက်
ဖြည့်တင်းရခက်ပါလားဆိုတဲ့
အဓိပ္ပါယ်နဲ့ ‘သမုဒ္ဒရာ ဝမ်းတစ်ထွာ'လို့
ဆိုကြတာပေါ့။
လောကမှာ သမုဒ္ဒရာ ဝမ်းတစ်ထွာလေး
ဖြည့်ဖို့ရာအတွက် ဒုစရိုက်နဲ့
အသက်မွေးပြီဆိုလို့ရှိရင်တော့
ဝမ်းတစ်ထွာလေး ပြည့်မယ်လို့ ထင်ပြီး
ကြိုးစားလိုက်တာနဲ့
ပြည့်လာမယ့်အရာကတော့
သံသရာထဲနစ်မွန်းမယ့်
ဆင်းရဲဒုက္ခတွေသာ ဖြစ်တယ်ပေါ့၊
ဘဝတစ်ခုရလာလို့ရှိရင်
ဝမ်းတစ်ထွာဆိုတာ
သေသည်အထိ ဖြည့်နေကြရမှာပဲ၊
အဲဒါကို မြန်မြန်ဖြည့်ချင်လို့
မမှန်ကန်တဲ့ စီးပွါးရေးတွေ
ပြုလုပ်ပြီးတော့ ဒုစရိုက်လုပ်ငန်းနဲ့
အသက်မွေးမယ်ဆိုလို့ရှိရင်တော့
အကုသိုလ်တွေသာ ပြည့်ပြီး
သံသရာဆိုတဲ့ ပင်လယ်ကြီးထဲမှာ
နစ်မွန်းမယ်၊ အပါယ်ငရဲကနေ
ဘယ်တော့မှ တက်လာနိုင်မှာ
မဟုတ်တော့ဘူးလို့ ဒီလိုဆိုနိုင်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၆၁။ ဗုဒ္ဓ၏အဆုံးအမကို လက်ဆင့်ကမ်းခြင်း
******************************************
မြန်မာနိုင်ငံမှာရှိတဲ့
ပရိယတ္တိကျောင်းတိုက်တွေ
အားလုံးဟာ အဆင့်ဆင့်
လက်ဆင့်ကမ်းပြီးနေကြတယ်၊
လွန်ခဲ့တဲ့ နှစ်(၂၆၀၀)
ပြန်ကြည့်လိုက်မယ်ဆိုရင်
ဒီပုံစံနဲ့ လာခဲ့တယ်ဆိုတာ ထင်ရှားတယ်၊
ကိုယ့်အလှည့်ရောက်တဲ့အခါမှာ
အမှတ်တမဲ့မနေဘဲနဲ့
မြတ်စွာဘုရားရဲ့ အဆုံးအမတွေကို
တစ်လုံးပဲဖြစ်ဖြစ် နှစ်လုံးပဲဖြစ်ဖြစ်
သင်ယူမှတ်သားကြရမှာ ဖြစ်ပါတယ်၊
မှန်ကန်ပြီး လောကအကျိုး
သံသရာအကျိုးကို
ဆောင်ရွက်နိုင်စွမ်းရှိတဲ့
အဆုံးအမတွေကို
လက်ဆင့်ကမ်းကြရမယ်။
ပဿတိ၊
မြတ်ဗုဒ္ဓသက်တော်ထင်ရှား ရှိစဉ်ကလည်း
“ယော ဓမ္မံ သော မံ ပဿတိ”
ဓမ္မကိုတွေ့မှ ငါ့ကိုတွေ့မယ်လို့ ဟောတာ၊
ပရိနိဗ္ဗာန်စံခါနီးမှာလည်း
‘ငါဟောထားတဲ့ ဓမ္မဝိနယတွေဟာ
သင်တို့ဆရာပဲ' လို့ ပြောထားတာ၊
ဒီစကားနှစ်ရပ်ကို ကြည့်မယ်ဆိုရင်
မြတ်စွာဘုရားက တရားကျင့်သုံးရေး
အဆုံးအမတွေကို လိုက်နာရေးက
အဓိကပဲဆိုတာ ထင်ရှားတယ်၊
ဒါကြောင့် တစ်လုံးသိသိ နှစ်လုံးသိသိ
လက်ဆင့်ကမ်းသွားကြဖို့ လိုအပ်တယ်။
ဒီလိုလက်ဆင့်ကမ်းသွားခြင်းအားဖြင့်
ဗုဒ္ဓအဆုံးအမတွေဟာ
လူသားတွေရဲ့နှလုံးသားထဲ ရောက်ရှိပြီး
အေးချမ်းမှုကို ဖေါ်ဆောင်ပေးနိုင်မှာ
ဖြစ်ပါတယ်။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
၆၂။ စိတ်၏ ထွက်ပေါက်များ
**************************************
ရံဖန်ရံခါ စိတ်ထဲမှာ
အလိုမကျမှုဆိုတာ ဖြစ်တယ်၊
ထိုအလိုမကျမှုဟာ
ကြီးထွားလာလို့ရှိရင်
ပေါက်ကွဲလာတတ်ပြီး
ငြိမ်းချမ်းတဲ့စိတ်ကလေး
ပျက်စီးလာတယ်၊
ဒေါသဖြစ်လာပြီဆိုရင်
လူ့ရဲ့မျက်နှာကလည်း
ကြည်လင်မှု မရှိတော့ဘူး၊
ပြုံးချိုခြင်း မရှိတော့ဘူး၊
မျက်နှာအနေအထားပါ
ပြောင်းလာတယ်။
အဲဒီလို စိတ်အလိုမကျတဲ့
ဗျာပါဒတို့ ဒေါသတို့ ဖြစ်လာပြီဆိုရင်
ထိုဒေါသရဲ့ထွက်ပေါက်ကို ရှာကြတယ်၊
တစ်ချို့က ကိုယ်မကျေနပ်တဲ့အရာကို
တခြားအရာနဲ့ အစားထိုးတယ်၊
သို့မဟုတ် မကျေနပ်တဲ့လူကို
တစ်ခုခုနဲ့ အနိုင်ယူလိုက်တယ်၊
အဲဒီလို အနိုင်ယူလိုက်တာဟာ
ထွက်ပေါက် မဟုတ်ဘူး၊
သို့သော် လူတွေက ဒါကိုပဲ
ထွက်ပေါက်ထင်ပြီး ထွက်နေကြတယ်၊
မလိုလားအပ်တဲ့ ပြဿနာတွေ
တက်လာတတ်တယ်ပေါ့၊
မြတ်ဗုဒ္ဓက စိတ်ထဲမှာ အလိုမကျတဲ့
ဗျာပါဒရဲ့ထွက်ပေါက်အစစ်က
မတ်ေတာတရားပါတဲ့၊
မေတ္တာပွါးခြင်းဖြင့် ဗျာပါဒရဲ့
ထွက်ပေါက်ကို ရရှိနိုင်ပါတယ်တဲ့၊
ဒါဟာ မှန်ကန်တဲ့နည်းစနစ်ပဲ။
ဒေါက်တာအရှင်နန္ဒမာလာဘိဝံသ
သက်ရှည်ကျမ်းမာ စိတ်ချမ်းသာ
လိုရာဆန္ဒပြည့်ပါစေ။
Credit -
{တရားပလ္လင်ထက်က စကားအလင်္ကာများ}
ဓ မ္မ သ ဟာ ယ တ ပည့် တစ် ပါး
စီ စဉ် ပူ ဇော် သည်။
ပြန်လည်မျှဝေပေးခြင်းဖြင့် ကုသိုလ်ပြုနိုင်ပါသည်။ ဓမ္မအသိဖြင့် အကျိုးရှိရှိနေပါမည်။
ကိုပြုံး (ခ) ကိုအောင်လင်း
