ကာမဘုံသားမှန်သမျှ’ကာမ’လို့ခေါ်တဲ့
‘အာရုံငါးပါး’နဲ့ကင်းပြီးရှင်သန်နေထိုင်လို့
မရပါဘူး။
ဒါကြောင့် ဘုရားရဟန္တာတို့လဲ
‘ပစ္စည်းလေးပါး’ဆိုတဲ့အာရုံငါးပါးကို
သုံးစွဲရပါတယ်။
သုံးစွဲတဲ့အခါ’ကာမသုခလ္လိကာနုယောဂ’လွတ်ပြီး
‘မဇ္ဈိမပဋိပဒါ’ကျအောင်သုံးဆောင်ပုံနဲ့ပတ်သက်လို့
ရှင်ရဟန်းတို့(ရိပ်သာတွေမှာတော့ယောဂီများပါ)
ဆွမ်းစားခါနီးဆင်ချင်တဲ့လင်္ကာအတိုင်း
သဘောပေါက်နိုင်ပါတယ်။
လင်္ကာက-
“ဤသည့်စားဖွယ်၊အမယ်မယ်ကို၊
မြူးရယ်မာန်ကြွ၊လှပရေဆင်း၊
ပြည့်ဖြိုးခြင်းငှါ၊မသုံးပါဘူး..
ဒီအပိုဒ်က-
‘ကာမသုခလ္လိက’အစွန်းရောက်တဲ့
ကာမစား’ပါ၊
ဒါကြောင့်’မသုံးပါဘူး’လို့
ပယ်ရတာပါ။
“လေးဖြာဓာတ်ဆောင်၊ဤကိုယ်ကောင်သည်၊
ရှည်အောင်တည်လျက်၊အသက်မျှတမ်း၊
မမောပန်းငြား…
ဒါကသက်ရှည်ကျန်းမာရေးအတွက်စားတဲ့
‘သဘာဝစား’ပါ။
အဲဒီသဘာဝစားကနေ’မဇ္ဈိမပဋိပဒါ’ဖြစ်ဖို့
အတွက်က
“ဘုရားသာသနာ၊ကျင့်နှစ်ဖြာကို၊
ကျင့်ပါနိုင်စေ..တဲ့။
ဒါကို’ဓမ္မစား’လို့ဆိုရမှာပါ။
ဒီလိုနှလုံးသွင်းဆင်ခြင်ပြီးစားရင်
‘မဇ္ဈိမပဋိပဒါ’ကျပါတယ်။
“ဝေဒနာဟောင်းသစ်၊မဖြစ်စေရ၊
ရာပိုထ်မျှလစ်၊ခပ်သိမ်းပြစ်ကို၊
မဖြစ်လေအောင်၊ချမ်းမြေ့အောင်ဟု”ကတော့-
“ဘောဇနေမတ္တညုတာ”ဆိုတဲ့အစားအစာကိုမျှတအောင်သုံးဆောင်ရမယ့်အတိုင်းအတာ
ပမာဏကိုပြတာပါ။
(ဝေဒနာဟောင်းသစ်၊မဖြစ်စေရ”ဆိုတာ-
‘ဆာလောင်မှု’ဝေဒနာဟောင်းလဲပျောက်ကင်း။
‘အစာမကျေပြည့်အင့်ခြင်း’ဆိုတဲ့
ဝေဒနာသစ်လဲမဖြစ်အောင်
’မျှတရုံ’သုံးဆောင်ရမယ်”လို့ဆိုလိုတာပါ။)
ဒါ့ကြောင့်-
“သုံးဆောင် မှိဝဲပါသတည်း”လို့ဆိုတာပါ။
ဒီလင်္ကာမှာ
“ကာမစား၊သဘာဝစား၊ဓမ္မစား”လို့
သုံးပိုင်းပါတာကိုသဘောပေါက်ပါ။
ကာမစာကိုပယ်ရမှာပါ။
သဘာဝစားကိုလဲ ဒီအတိုင်းစားရုံဆို
ကာမစွန်းလွတ်ပြီလို့မဆိုနိုင်သေးပါဘူး။
သဘာဝစားကိုဓမ္မစာထိရည်မှန်းမှ
ကာမစွန်းလွတ်ပြီး
မဇ္ဈိမပဋိပဒါလမ်းမှန်ရောက်ပါတယ်။
အဆုံးမှာ-
“သုံးဆောင်မှိဝဲပါသတည်း”လို့ဆိုလိုက်တဲ့
အတွက်-
“အတ္တကိလမထာနုယောဂ”အစွန်းလဲလွတ်သွားပါတယ်။
တခြားပစ္စည်းဥစ္စာတွေကိုရှာဖွေရာမှာလဲ
ဒီသဘောအတိုင်း
“ကိုယ်တိုင်လဲ ကျန်းမာချမ်းသာအောင်
ခံစားသုံးစွဲနိုင်ဖို့၊
‘လောကတ္ထစရိယ,ဉာတတ္ထစရိယ’အဖြစ်
တခြားလိုအပ်သူတို့ကိုလဲဲ ကူညီလှူဒါန်းနိုင်ဖို့လို့
ရည်မှန်းရှာဖွေ သိမ်းဆည်းသုံးစွဲကြရင်
‘မဇ္ဈိမပဋိပဒါ’ကျတယ်လို့
သဘောပေါက်ရမှာပါ..ဆိုတဲ့အကြောင်း။
မဇ္ဈိမပဋိပဒါကျ
စည်းပွါးရှာတတ်ကြပါစေ..
