မြတ်စွာဘုရားလက်ထက်က
သုန္ဒရီဘာရဒွါဇပုဏ္ဏာကြီးက
မြတ်စွာဘုရားကို”ဗာဟုကာမြစ်;ဂယာဆိပ်ကမ်းစသည်မှာရေချိုးပါရဲ့လား”
လျှောက်တယ်။
“ဘာကိစ္စနဲ့ချိုးရမှာလဲ”ဆိုတော့
“အကုသိုလ်အညစ်အကြေးတွေမျှောပစ်ဖို”တဲ့။
ဗြဟ္မဏတို့အယူအရ
ဖဂ္ဂုနီနက္ခတ်ကောင်းနဲ့ယှဉ်တဲ့
(နှစ်ကုန်)တပေါင်းလမှာ
ဗာဟုကာမြစ်;သန္ဒရိကမြစ်;ဂယာဆိပ်ကမ်း;
သရဿတီမြစ်စသည်မှာရေချိုးလိုက်ရင်
အကုသိုလ်အညစ်အကြေးတွေအကုန်လုံး
ရေမျောပြီးစင်ကြယ်သွားမယ်လို့
ယုံကြည်ကြပါသတဲ့။
လက်ရှိသင်္ကြန်ရေလောင်းကြတာလဲ
အဲဒီဗြဟ္မဏအယူကဆင်းသက်လာတာ
ဖြစ်နိုင်ပါတယ်။
စောစောပိုင်းဗြဟ္မဏဝါဒအရတော့
သင်္ကြန်ကိုခုလိုနေ့ရက်တွေမပြောင်းဘဲ
၁၂-လနောက်ဆုံးဖြစ်တဲ့’တပေါင်းလ’ကိုပဲ
နှစ်ကုန်လို့ယူတဲ့သဘောထင်ပါတယ်။
မြတ်စွာဘုရားက
သုန္ဒရီဘာရဒွါဇပုဏ္ဏားကြီးကို
“မြစ်တွေကဘာလုပ်နိုင်မှာလဲ၊
မကောင်းမှုကိုမသုတ်သင်နိုင်ပါဘူး။
(ကိလေသာ)စင်ကြယ်သူဟာ
အခါခပ်သိမ်း’ဖဂ္ဂုနီနက္ခတ်ကောင်း’ကြုံနေတယ်၊
အခါခပ်သိမ်းဥပုသ်စောင့်သုံးပြီးဖြစ်တယ်။
စင်ကြယ်သန့်ရှင်းတဲ့သူမှာကျင့်ဝတ်အမြဲပြည့်စုံတယ်။
ပုဏ္ဏား!ဒီသာသနာမှာသာ(တရား)ရေကိုချိုးပါ!
သတ္တဝါအားလုံးတို့အပေါ်ဘေးရန်ကင်းအောင်ပြုပါ”လို့တိုက်တွန်းပါတယ်။
(တခြားတစ်နေရာမှာတော့-
“မြစ်တွေကအကုသိုလ်တွေစင်ကြယ်အောင်ဆေးနိုင်တယ်ဆိုရင်
မြစ်ထဲကငါးတွေ;လိပ်တွေအားလုံး
အရိယာတွေဖြစ်ကုန်ရောပေါ့”လို့လဲ
ဟောထားတာရှိတယ်)
ပုဏ္ဏားကြီးသာသနာ့ဘောင်ဝင်ရဟန်းပြုပြီး
တရားရေနဲ့ကြိုးစားချိုးလို့
မကြာမီရဟန္တာဖြစ်သွားပါတယ်။
(မူလပဏ္ဏာသ၊ဝတ္ထသုတ်)
ဗုဒ္ဓဘာသာဝင်တို့ဆင်နွှဲနေကြတာကရော..
ဗြဟ္မဏဝါဒသင်္ကြန်လား၊
ဗုဒ္ဓအလိုကျသင်္ကြန်လား၊
ဘယ်လိုသင်္ကြန်နွှဲပြီး
ဘာတွေဖြစ်နေကြလဲ။
မမေ့တဲ့သတိနဲ့
ဆင်ခြင်ပြုပြင်နိုင်ကြပါစေ..
