နောက်တစ်ခုက-လောကထဲမှာ

လောဘကြောင့်လူရာဝင်ရတာရှိသလို..

လောဘကြောင့်ပဲ လောကရဲ့အောက်တန်းအကျဆုံးအပါယ်ဘုံထိကျသွားရတာလဲ

ရှိပြန်တယ်။

ဒါကြောင့် ဘုရားအဆူဆူတို့ရဲ့ ပထမဆုံး

တရားဦးဒေသနာတော်မှာ-

"လောဘကြီးတတ်အောင်"ပထမဆုံး

ဟောတော်မူရတာဖြစ်မယ်ထင်ပါတယ်။

ဒီအကြောင်း..ဒေးဒရဲနိကာယ်သင်တန်း၊

ညပိုင်းစကားဝိုင်းမှာစကားစပ်မိကြတော့-

တရားဓမ္မဗဟုသုတအထိုက်အလျောက်ရှိတဲ့

ဒကာကြီးက-

"တရားဦးဓမ္မစကြာကို တပည့်တော်

မြန်မာလိုအဓိပ္ပါယ်ပါသိပြီး မပြတ်ရွတ်ပါတယ်၊

အဲဒီထဲမှာ'လောဘကြီးတတ်အောင်'ရယ်လို့

ဟောထားတာမတွေ့မိပါဘူးဘုရား။

ပြီးတော့..ဒါကိုပထဆုံးဟောတယ်ဆိုတာက

ပိုပြီးနာမလည်စရာဖြစ်ပါတယ်"လို့လျှောက်ပါတယ်။

သင်တန်းရဲ့နာယကဖြစ်တဲ့-နတ်မှီဆရာတော်ကြီးက-

"ဒကာကြီးက လောဘကြီးတတ်အောင်နဲ့

ပထမဆုံးဟောပုံကို သဘောမပေါက်လို့ပါ၊

မဂ္ဂင်ရှစ်ပါးထဲက'သမ္မာအာဇီဝ=တရားနဲ့အညီအသက်မွေးခြင်း'ဆိုတာ ဘာပြောတာလဲ၊

'အသက်မွေးတယ်'ဆိုတာ စီးပွားဥစ္စာရှာရတာမှို့လား၊

ဒါကိုလောဘမပါဘဲရှာလို့ရမလား၊

သတ္တဝါတိုင်း မရှာမဖြစ်ရှာရမှာပဲ။

အဲဒီလိုရှာကြရာမှာ'သမ္မာ=တရားနဲ့အညီ'ဆိုတာ

လောဘကြီးနည်းပေါ့။

ဒါကြောင့် လောဘအကြီးစားတွေဖြစ်တဲ့

ရှင်ဘုရင်တွေ၊သူဌေးကုန်သည်တွေ

ဘုရားရှင်ရှေ့မှောက်မှာ ဝိုင်းဝိုင်လည်

ကြည်ညိုကြတာပေါ့။

(ဒီအကြောင်း ဆရာတော်နဲ့

ရာဟုလာသံကစ္စည်းဆွေးနွေးတဲ့ကိစ္စမှာလဲ

ပြောခဲ့ဖူးပါတယ်။)

'ပထမဆုံး'လို့ဆိုရတာကတော့-

မဂ္ဂင်ရှစ်ပါးကို သိက္ခာသုံးပါးနဲ့ခွဲလိုက်တဲ့အခါ-

'သမ္မာအာဇီဝ'ပါတဲ့'သီလသိက္ခာ'က

ပထမဆုံးကျင့်ရတာမဟုတ်လား"ဆိုပြီး

ရှင်းပြပါတယ်။

ဒကာကြီးက-

"တင်ပါ့ သဘောပေါက်ပါပြီ၊

ဟုတ်သားပဲ၊အနာထပိဏ်တို့၊ဝိသာခါတို့စတဲ့

သောတာပန်အရိယာသူဌေးတွေလဲ

လှည်းပေါင်းငါးရာနဲ့ကုန်သွယ်ရောင်းဝယ်လုပ်ကြတာပဲ"ဆိုပြီး

လက်ခံကျေနပ်သွားပါတယ်။

သင်တန်းနည်းပြ၊ကွင်းကျောင်းဆရာတော်ကလဲ-

လောကက အပြီးလွတ်အောင်မရုန်းနိုင်သေးတောင်

အပါယ်ကလွတ်အောင်ရုန်းနိုင်ဖို့ပြောနေတာ

ဒကာကြီး.."လို့ဖြည့်စွက်ပြောပြပါတယ်။

လောကထဲကအလွတ်မရုန်းနိုင်သေးသမျှတော့

လောဘကိုတရားနဲ့အညီကြီးတတ်ဖို့လိုပါတယ်။

အဘိဓမ္မဒေသနာမှာ လောဘကိုအကောင်းအဆိုး

မခွဲခြားပေမယ့်..

သုတ္တန်ဒေသနာမှာတော့-

"တရားနဲ့မညီတာကို'ဝိသမလောဘ၊

တရားနဲ့ညီတာကို'သမလောဘ'လို့

ခွဲထားပါတယ်။

အပါယဘေးနဲ့ဝေးအောင်

လောဘကြီးတတ်ကြပါစေ..

၂၃.၂.၂၃

(ဒီအကြောင်းအရင်ကလဲရေးခဲ့ဖူးပေမယ့်..

ဒီနေ့စွဲလေးကိုအမှတ်တရဖြစ်လို့

ထပ်ရေးလိုက်တာပါ။)